當年今日
關於我們

【六四30】文雋妙計安排妻加國生仔 盧海鵬移民喊爆 鍾鎮濤趕入紙

蘋果日報 2019/06/03 08:00


北京屠城後,香港人向當時宗主國爭取居英權,但100名香港藝人包括劉德華、譚詠麟、曾志偉等卻在向華勝振臂一呼下,聯署「我們不要施捨」公開聯合聲明,表示放棄爭取英國居留權利,亦不會向英國乞討。
有人辭官歸故里,有人漏夜搞移民。如文雋。
89年,文雋在太太羅嘉慧(已離異)懷孕後,即安排她到加拿大待產,待兒子一出世就可申請居留權。文雋坦認,擔心兒子會在「冇選擇之下成為香港人」。
文雋當時在好友舒琪執導紀錄片《沒有太陽的日子》中說:「到97我就啱啱40歲喇,對我哋嚟講,可能下半生好快就能夠適應,我唔想自己個仔將來一出世係冇國籍。啲人講五十年不變,大家又講緊BNO問題,但係個Passport將來可以喺邊度用得冇人知。我唔想我個仔係一個冇國籍嘅人。
「所以當太太有咗身孕,加上身邊朋友慫恿,好似張堅庭咁,佢又係好驚共產黨、家姐啲女全部過晒加拿大,我就諗,個仔唔需要喺冇選擇之下就成為香港人,咁最好、又最易嚟,而且又有先例嘅,就係嚟加拿大。」
文雋安排太太在89年6月19日抵加拿大,當時太太已經「見肚」,但文雋並不擔心會遭拒入境:「我好放心,因為一早準備晒,過海關嗰陣揀啲後生仔,因為佢哋冇check大肚婆嘅經驗;同埋個人可能心地好啲,因為初初入行,唔似啲女人或者上咗年紀嗰啲就冷血啲。
「同埋我已經諗咗一個最差嘅情況,就係如果太太真係俾人知道佢有身孕、唔畀入嚟嘅時候,我就一定喺加拿大海關咆哮,話:『我估唔到返咗加拿大就好似嚟到中國咁!嚟到多倫多就好似去咗北京咁唔講人權!』我相信到時我講呢番說話嘅時候,點都畀我入嚟啩!」典型香港人。
仍是89年,盧海鵬比文雋早半個月到加拿大報到——攜女兒移民加國,當時鵬哥感慨得在機場流淚,報章娛樂版還語帶雙關:「阿鵬終於下台!」此鵬不是李鵬。
「文化大革命嗰陣,我由大陸嚟香港,估唔到依家又要去加拿大做移民。」他稱移民是為仔女將來謀出路,他本人不想在加拿大落地生根,故未出發已表示希望他日回流:「不過將來返回香港時,可能父母已經離開呢個世界。」說時不禁落淚。
經歷過文革,盧海鵬嘆那時混亂不堪,相比今次北京學運,學生都表現得很理智:「佢哋受過高深教育,亦有一顆愛國熱心,將來對國家會有大貢獻。我支持學生爭取民主運動。」惟在機場時,鵬哥已斷言,北京必定開槍。
結果真是開槍。
愛國藝人鍾鎮濤,現在他聲稱向中國老兵敬禮、唱《義勇軍進行曲》會激動痛哭,30年前可不是這麼想。89年5月,鍾已說:「本來辦咗移民美國,但唔想坐移民監,又對香港有歸屬感,所以唔搞住,但依家國內情況咁令人擔心,我都對香港前途失去信心,所以再入紙。」首選是加拿大。
鍾鎮濤當時說:「我對依家嘅中國好失望,中國人千辛萬苦設法移民、逃避中國政府統治中國人,寧願移民海外做次等公民,領導人係幾咁失敗。」他稱對國內領導層已感絕望,也為大陸學生和人民感到憂慮。
張學友也表示對中國政府感失望。「自己身為中國人,唔知點樣去面對呢個政府。我自己覺得中國係文明古國之一,估唔到喺一個咁文明嘅社會會做出一啲咁不文明嘅事,我係極度失望。」故亦有移民的打算。三哥苗僑偉則稱,一直是愛國分子,但也會密切注視事情如何解決;如果解決得好,他不走;假如李鵬不下台,他亦只有移民了。
但也有人不怕死,例如當年被北京點名的岑建勳。
屠城之前,岑建勳已表明,不怕秋後算賬,不會移民。「我唔會走,我唔怕死,我冇任何國家證,得香港出世嘅護照。我唔怕秋後算賬,我算得啲乜嘢?」
至04年,在文化部及統戰部安排下,岑建勳才獲北京發出一次過回鄉證。當時有指統戰部希望藉此統戰香港電影界,減少他們對中央及特區政府的不滿。
--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片!下一個爆料王就係你
https://bit.ly/2Guolu9
empty