三哥苗僑偉同戚美珍前晚喺中環嘅Backstage餐廳慶祝結婚20周年（搪瓷婚），順道補祝阿戚今個月5號48歲生日，圈中好友袁詠儀同張智霖、佘詩曼、馬德鐘夫婦、湯盈盈、陳敏之、洪天明同女友周家蔚、吳卓羲、伍詠薇同老公練海棠、黎瑞恩等都有到賀。三哥同阿戚玩到凌晨差不多4點離開時，仲應記者要求咀嘴，咀足30秒大晒恩愛。
陳敏之噚日凌晨12點幾就先行離開，見佢唔單止腳步浮浮，個樣仲好似唔多開心。冇幾耐馬德鐘兩公婆亦離開，然後跑咗去附近嘅鏞記大廈，原來陳敏之匿咗喺入邊，仲傳佢因為唔開心匿埋喊。大概一分鐘後，敏之離開大廈上的士，問佢究竟發生乜嘢事，佢就話：「冇嘢喎！影乜嘢啫。」

黎瑞恩仆倒尷尬

馮仁昭四圍打聽，敏之前晚真係純粹飲大咗，並唔係傳聞中發生過啲唔開心嘅事。噚日敏之一早出發去廣州做嘢，佢喺電話中解釋話前晚因為太開心所以令人誤會，原來佢去三哥派對前，已經出席咗朋友婚宴，連踩兩場飲多兩杯，馬德鐘追出嚟只係想車佢返屋企，敏之話：「當時我有少少醉，見好多記者衝埋嚟，自己唔想俾人影啫，我冇喊亦都冇發脾氣。」
馬德鐘就話：「我應承車敏之，點知佢突然走咗，我追番佢啫。佢唔係匿埋，係等一位幕後朋友一齊搭的士，都冇事發生。」另外，黎瑞恩離開嗰陣唔小心仆倒，場面都幾尷尬。