薛凱琪（Fiona）近來搞時裝品牌，做生意沉著放長線，而投資方面都頭頭是道，仲有賣樓賺咗近千萬，不過佢就歸功精明嘅媽媽，除咗搞生意，薛凱琪都好勤力拍戲，咁感情方面又點呢？薛凱琪都好少提起，不過日前《蘋果》就發現佢同個男伴一齊出現喇。

日前喺中環就見到薛凱琪食拉麵，身邊仲有一個男伴，當佢哋食完出嚟嘅時候，薛凱琪就載住口罩出嚟，男伴就先去攞車，而薛凱琪就自己開車門上車。

記者上前影相，薛凱琪就打開車窗同記者講：「記得影佢影得瘦啲。」問到呢個係唔係男朋友，佢就話：「唔係啦，朋友嚟，你哋影啦。」女方就好大方，不過男仔就有啲閃縮，之後佢哋就去到上環，薛凱琪自己一個落車之後，男仔就極速開車離開。