今屆英超亞洲挑戰賽落實7月19及22日喺大球場舉行，由利物浦、李斯特城、水晶宮及西布朗角逐，雖然足總未公佈賽程及票價安排，但網上已傳出有大球場門票分佈圖及兩日票價安排嘅內部文件，對賽19日黃昏六點，先由李斯特城對西布朗進行頭場，尾場八點半由利物浦對水晶宮；兩場勝方會喺22號八點半踢決賽，負方會喺六點踢季軍戰。至於港人最關心嘅票價安排，初賽日正價門票分為300、360、420學及600港元，學生及長者票180元；決賽日正價門票為360、480、540及720港元，學生及長者票為240元。門票預售或購票方式等具體細節，就要等官方正式公佈。