咁又係,新地一年咁多樓賣,雷霆仲要幫老闆管理其他事務,幾難抽身。佢老闆郭炳聯舊年為準備參賽,要去東涌、欣澳特訓呀。
不過62歲嘅雷霆都算弗,舊年跑樓梯,用咗29分鐘完成,比郭炳江兒子、新地董事郭基煇慢7分鐘,郭炳聯就要40分鐘完成。
雷霆謙稱,唔係跑得叻,只係識得留力,此乃跑樓梯嘅秘訣。而佢每朝早亦會做運動,例如做Gym,保持身心健康咁話。
講得興起,佢又爆料,叫大家咪以為大隻仔一定跑樓梯跑得快,佢見過唔少外資投行嘅大隻後生仔跑到喘晒氣。
如無意外,今年底新地再辦跑樓梯,佢都會積極備戰,其實除咗跑一餐,雷霆指,ICC係商業樓宇,跑完100層之前,有隔火層可以抖唞,其間又有唔少笑容可親嘅同事遞水遞香蕉,為跑手打氣,等大家順利完成賽事,過程都幾爽㗎。
李華華
mailto:
[email protected]