如今社會狂熱高呼樓價必漲，買樓收租幾十年的中原執董張奕威(Simon)卻不苟同，形容樓市淡友集體淡聲有如1997年跌市前夕，推斷樓價下滑不遠矣，早前更分批放售物業，收割利潤離場。

「回歸20年，香港經濟啱啱好喺一個循環。」Simon長年研習本地樓市波動，分析二戰後至回歸前數十截的樓市周期，結論是每個周期樓價由低位到頂峰的累積升幅介乎4倍到8倍。

憶述主權移交前，Simon曾沈思往後樓市規律會否延續，最後決定日後繼續壓注本地物業，但有感九七樓市充斥末日心態，所以金融風暴前已大致將物業組合清倉。

「回歸前英國佬政府真係唔鬼理(樓市)，好Free，話之你個市場點呀，佢都走囉，一路都好放任，未日心態令啲賭性出晒黎」， 惟物極必反，環球巨浪令業主集體輸凸，回歸後首6年「負資產」、「樓蟹」不絕於耳。

「1997年初係人都知個樓市好危險，但無人相信係(跌市)黎得咁快，果陣時話咩回歸呀、中國必好呀咁。」Simon憶述，「跌市嗰幾年大家聞樓變色，叫佢買樓，越叫越走，所以你睇返轉頭，依家個個諗住有樓就發達嘅心態唔係必然存在。」

其後Simon使用移動平均線等分析工具，於CCL(中原城市領先指數)約莫40點時確認升浪重臨，開始大舉入市。

「以前我一直講，無論CCL係40點、50點，我都話一定見120點，個個話我痴線。」Simon稱信心源自過去樓市規律是由谷低反彈到高位最少錄4倍升幅，以指數31.73點最低點為基數，能夠升至120點是理所當然。

至近年樓價指數升穿120點，Simon稱已經逐步出售收租物業，至今只餘少量單位及自住物業，更估計樓價升勢後勁有限，原因之一是特區與港英政府對干預樓市的弋態度北轍南轅。

「唔係政府壓住個樓市依家都癲左，CCL過咗200點都有……尤其是新一屆政府，等你升到160點咁熱血沸騰，佢點都要做野喇掛，政府真喺有工具可以即時降溫……等外圍經濟降溫，可能就會出現下跌周期。」

與此同時，「有樓就發達」的集體信仰再現，樓市氣氛亦與1997年雷同，「樓市神話嘅基本平台都搭建好晒，即係無人會相信樓市會跌，就算相信果個都唔夠膽講，好多衰過幾次果啲淡友都唔講喇，個情況就等於九七。」如今退居幕後Simon自嘲不過是無頭無面的Nobody，方可以打開天窗說亮話。

大台節目形容樓市淡友如中「長期等跌伏」，Simon卻奉勸買樓要有耐心，「千祈唔好依家入市呀，個風險好鬼大，太似九七前。食咗呢個(跌浪)，你可能成世畀佢拖死嫁，真係唔洗考慮。」

不過，對於預測確實的跌市時間，Simon都只是聳一聳肩，交出一句官腔式的回應「無人有水晶球」，只是強調引爆點會出人意料 (took everyone by surprise)，「幾時出現響果段時間入邊係隨機，好似科學家預測地震都只是預測大約時間、範圍，但確實係幾時、咩地方係估唔到。」

記者：陳東陽

掌握財經生活資訊，即Like「蘋果ATM」fb專頁啦！
http://fb.com/appledailyatm