眾所周知阿仙奴領隊雲格係法國佬，對同胞零舍有興趣。周三英格蘭嗰邊傳嚟驚人消息，雲格竟然對曼聯旗下嘅棄將、31歲的施維斯達有興趣，睇嚟單嘢堅嘅程度，真係拍得住彭丹嘅身材！
阿仙奴大把傷兵唔係秘密，佢哋冇錢買好球員都唔係新聞，估唔到嘅係，雲格最新目標竟然係施維斯達啫。睇番兵工廠條正選防線，已經有中堅加拿斯同左、右閘基捷基治同沙格拿三位法國仔，唔通雲格想整條純法國防線？唔好唔記得，後備席上都有法國小將阿曼特查奧爾喎。
曼聯自從簽入艾拉之後，施維斯達近年都冇正選打，上季只係替紅魔上陣過6場比賽咁大把，領隊費Sir早已當垃圾扔。原本施維斯達已打算過檔曼城，仲喺嗰邊做緊體測；佢一聽到雲格對佢有興趣，嗱嗱聲着番條長褲飛去阿仙奴做體測，直頭快過差人嘅掃黃行動。鬼咩！曼城揭幕戰輸大大鑊2:4畀維拉，施維斯達費事上賊船咋啩？
單嘢如果傾得成，施維斯達係免費過檔去阿仙奴，由於唔使轉會費關係，有傳雲格肯畀50,000鎊（約72萬港元）周薪佢𠻹！施維斯達值唔值呢個人工見仁見智啦，不過佢話晒係前法國國腳，又可以打中堅同左閘，唔使轉會費都值呢個價嘅。

好命水專踢大會

不過話時話，施維斯達呢條友都幾好命水，99年以400萬鎊過檔曼聯前，佢係效力意甲勁旅國際米蘭㗎！𠵱家又有另一支大球會阿仙奴對施維斯達有興趣，佢嘅職業生涯算係咁啦！
講番阿仙奴今次嘅舉動，又係向法國兵埋手，睇番近年喺雲格手上簽入同放走嘅，真係多到你唔信，等我求大俠數畀大家聽先。拿斯尼、法米尼、亨利、沙格拿、加拿斯、戴亞比、韋拉、皮利斯……閒閒哋都十幾個法國仔，雲格你條買人賣人路真係易捉。