英超利物浦喺今個夏天一直都想為後防補強，而佢地嘅頭號目標就係修咸頓中堅華基爾雲迪積克，奈何最後都冇成事，叫一眾利迷非常失望。美國有位利迷就似乎忍唔住，佢早前喺波士頓紅襪一場職棒比賽入面，對住利記老闆約翰亨利大叫「簽雲迪積克！」，但對方就似乎冇咩反應。

睇返當時段片，嗰位利迷當時坐喺看台較前位置，同約翰亨利相距不遠。佢當時向亨利大叫「一月簽雲迪積克係正確嘅決定！佢本人都好想踢利記！」亨利之後望返上看台，但冇俾反應。睇返資料，約翰亨利係美國芬威體育集團（FSG)嘅老闆，而FSG就係利記同埋紅襪嘅母公司。

睇返利記依家個陣，最掂嘅中堅就梗係祖爾麥迪比，但佢嘅拍檔只係「炸彈」卡拉雲同埋洛夫雲，雲迪積克嘅重要性可以話係不言而喻。

↓利迷遇着約翰亨利片段↓
http://bit.ly/2x76QM3