放假在家眼光光望住電話等人約，除了拜年、飲茶外，便是魚蝦蟹及射龍門，無啥新意。大嚿祖獻新猷，致電相約去大埔釣魚，題材咁新穎，當然𦧲飯應。
過了大埔工業區便接近郊區，四圍都見到人踩單車，令我想起自己𡃁仔時曾在新娘潭亡命掟彎落大斜，然後炒到小露寶咁。行行重行行，發現大嚿祖捨海邊而往內陸走，剛想發問，大嚿祖已大喝一聲：「到咗！」
開估，原來係在魚塘釣魚，魚塘老闆轉營，按人頭收費，包可釣若干斤魚帶走；魚餌方面，死蝦任攞，活蝦則逐隻計。

不太明白在一個限定的水域內釣一些限制數量的魚有甚麼大樂趣，但當日所見，大量一家大細、三五知己、甜蜜愛侶釣得興高采烈，一邊燒嘢食一邊釣魚不知幾咁開心。
身邊的是一位帶齊架生的專業釣友，多口問句點解唔出海釣，釣友答道：「出海釣打龜打得多」，意即食白果食得多，「所以咪嚟呢度過手癮囉。」「咁點解要用到十幾呎咁長嘅一支魚竿呢？」「無他嘅，細細條魚都經已搞到支竿彎晒，『擴大手感』，好過癮㗎！」釣友個樣真係好有手感。明白晒，男人邊個冇手癮，𠵱家重有得擴大手感，呢種娛樂你話邊度搵？
當日釣到一條四斤重的懶懶唔願郁石斑，帶到飯館大魚三味之，味道雖然新鮮，但一人一魚間已建立了幾個鐘頭的感情，有點食不下嚥……