莊思敏（Jacquelin）今日喺尖沙嘴出席電競賽車挑戰賽發佈會。

Jacquelin以活動大使身份出席活動，佢話經營嘅酒吧都有派隊伍參賽，但自己就唔會落場，佢話：「我打機好渣，不過都會試吓玩，呢啲留返畀小朋友、男仔落場。我打機會頭暈，之前中環電車賽唔可以落場試，就用打機嚟試，揸咗2、3個圈就好暈要叫停。」不過Jacquelin就話如果未來男友鍾意打機都冇所謂，只要唔係沉迷就可以，佢仲話可以投男友所好，若對方鍾意，都願意陪男友打機。

Jacquelin話對真車賽車先有興趣，12月尾有比賽，希望明年繼續呢個運動。佢透露嚟緊會返馬來西亞4日，休息吓兼探望家人，佢笑言經常畀媽咪催拍拖結婚，但自己已經盡量減輕工作，可惜仍未遇到，大感無奈。

精選娛聞，喺晒《娛果》
http://fb.com/appledailyent