「山神」阿歷斯山齊士續唔續約留喺阿仙奴仲未明朗化，佢老家智利就有唔少人關心呢件事，早前仲有班智利球迷喺facebook發起支持山神離開阿仙奴嘅遊行，仲有成大約14,000人支持話會撐場。點知掀掣就好有力，到要做嗰陣就軟弱無力，到咗當地周三下晝約定話抗議遊行嘅時間，只係得5個人出現，hea咗一輪就唱K畀啲掌聲自己，然後散水。

主辦者之後補飛話，其實整呢個網頁都係搞下笑，唔使太認真，咁唔知山神續約搞咁耐，又係咪認真想留隊呢？