基於今年好多日本賽駒來港參加國際賽，因此日本中央競馬會（JRA）決定為下月11日香港舉行的四場國際一級賽開盤受注。

其實日本今年先至放寛為個別海外賽事開盤，例如法國凱旋門大賽、澳洲墨爾本盃、美國育馬者盃雌馬大賽等，好讓當地馬迷更加投入世界各地頂級賽事。

而香港國際賽向來都受到日本馬壇高度重視，今次JRA都有播放香港國際賽參賽馬晨操片段，至於比賽當日更邀得經常為香港馬會撰寫日本越洋直播賽簡介的賽馬主持合田直弘作現場實地報道。合田直弘本身英文良好兼熟悉香港賽馬，搵佢做節目最好不過。