去年風頭人物《來自星星的你》嘅全智賢今年雖然冇作品入圍，但係佢今晚都有出席第51屆百想藝術大獎，並擔任頒獎嘉賓。

去年得大賞嘅全智賢今年就負責頒發大賞，佢着件粉色嘅服飾出場，簡單俐落，散發女神風範，一出場即獲得全場掌聲。最後佢頒發電視組別大賞比大熱綜藝節目《一日三餐》嘅羅䁐錫導演，而電影組別大賞就由崔岷植奪得。

至於電視組別嘅大獎，包括最佳男主角，就由《未生》嘅李聖旻打低幾位勁敵，包括趙寅成嘅《沒關係，這是愛情》同埋池晟《愛上哪個我》等，而最佳女主角就由宋允兒憑《媽媽．無所畏懼》奪得，宋允兒攞獎時激動得喊起來，特別係提到拍劇時冇時間見愛兒更加哭不成聲。

而電影組別方面，最佳男主角就爆冷由《黑仔刑警》嘅兩位演員李善均同趙震雄同時奪得，趙震雄得知結果時更一時反應不過來，兩人更興奮得即時擁抱起來。至於最佳女主角方面就由《逆權師奶》嘅廉晶雅得獎。

最佳電影及最佳劇集就分別由《黑仔刑警》和SBS嘅《聽到傳聞》奪得。