早前英國《泰晤士報》提過，英國注資救市計劃係由財政部擬定具體措施，然後交畀瑞銀UBS兩個高層執靚。至於財政部呢個計劃點嚟，就冇提到，大家好自然當咗係白高敦一班高官度出嚟嘅。
英國《電訊報》網站噚日爆出，直接向銀行注資呢個方案，洗博德先係主腦。佢同渣打財務總監RichardMeddings喺兩個禮拜前，見金融海嘯惡化，英國啲銀行好苦惱，於是認真研究有咩方法解決當前問題，條橋就係咁度出嚟嘞。
報道冇講到呢條絕世好橋諗咗幾耐，總之條橋一出，佢哋即刻走去同財政部高官講，包括有份執靚個方案嘅高官，同首相白高敦嘅謀臣。
報道引述英政府內部消息，班高官要求冼博德同Meddings白紙黑字交出嚟，而呢份文件，就係英國注資救市計劃嘅初稿。最後出嚟嘅救市方案，好大部份沿用初稿，政府只係加強細節同條文。