從來唔吝嗇騷深長事業線嘅莊端兒，今日去書展宣傳新書，又點會令大家失望呢？之前努力減肥，瘦咗15磅嘅莊端兒，今日下晝就着咗件桃紅色低胸連身裙現身，仲不停彎身同書迷簽名，狂晒4寸事業線。

噚日「阿雪」孫慧雪喺同一個書檔谷新書，問佢係咪特登唔落嚟，怕撞到正？莊端兒即刻解話，表示噚日有嘢做唔得閒，又話唔係要爭，自己都好想佢喺度，如果係就仲多人排隊。

莊端兒又話本書第一版印咗10,000本，工作人員同佢講呢兩日已經賣咗5,000本，佢話：「其中有2,000本係一個神秘人買，自己都好想知係邊個，唔知男定女。」問佢有冇叫男友張致恒（Steven）買書支持？莊端兒講笑話佢唔買2,000本都要買200本，不過就話男友失咗蹤，仲未message佢。笑問佢Steven係咪冇眼睇？莊端兒就幫男友解釋，話佢可能喺高山拍戲收唔到電話。