相信大家呢幾日對霆鋒嘅廚藝嘅認識又深咗一層，喺各大社交網絡平台都見到霆鋒「左右開弓」唧朱古力醬嘅英姿，就連影帝黃秋生都忍唔住ChefNic上身拍片（相關新聞： http://bit.ly/2iBUJBZ ）。霆鋒迷到嘅又點止得秋生，仲有伍家謙同霆鋒嘅師弟張敬軒。

伍家謙喺fb拍咗段片，一樣喺左右開弓唧醬，不過佢唔係唧朱古力醬，而喺左手麻醬、右手甜醬咁唧腸粉，而佢仲hashtag埋「#ChefNg」。講到精緒方面，伍家謙重點唔係放喺「扔醬」嗰下，而係着重模仿霆鋒專注嘅神情，縐埋眉頭真係有幾分霆鋒嘅feel。

至於張敬軒，佢就同鍾舒漫一齊拍片上ig，先講造型軒仔details位做到十足，就連霆鋒出席活動件衫膊頭嘅流蘇都跟到足。而片中軒仔左右開弓揸筷子，夾住兩塊牛肉起勢咁淥，之後唔少得扔筷子啦！之後重點嚟喇，軒仔扮霆鋒頭也不回咁離開之後，突然返轉頭，拆咗膊頭嘅流蘇掉埋去淥，原來係兩團生麵嚟。

而軒仔咗post咗段片三粒鐘之後再post 2.0，佢留言話：「話說我驚鋒師兄嬲嬲，諗諗下都係send條片俾佢報定案先，點知佢第一句問我點解唔配樂？好，我九秒九即配！各位朋友，請將音量收細......」聽真啲原來軒仔配咗粵劇音樂，唔怪之得叫大家音量收細啦！