由熱心人士成立嘅杜葉錫恩教育基金，今日宣佈舉辦2015年全港小學生進步獎，表揚喺操行、級別名次、課外活動有進步嘅小四至小六學生。咁啱早幾日又係杜葉錫恩102歲生日，基金就趁住呢個特別嘅日子，為杜太慶祝生日。

杜葉錫恩幾十年嚟都對教育工作非常熱心，早於1954年就創辦慕光英文書院。基金今日喺番慕光英文書院宣佈進步獎活動，順道為杜太進行簡單嘅切生日蛋糕儀式，寧舍有意義。

有份出席活動嘅自由黨主席鍾國斌Felix話，雖然年屆102歲嘅杜葉錫恩行動唔太方便，現身活動時要坐輪椅，但係仍然相當精神，Felix同佢講生日快樂嘅時候，佢都會報以微笑回應。喺度亦補祝杜葉錫恩博士生日快樂、身體健康。