大灣區近乎成為香港政經官員嘅口頭禪，按證公司總裁李令翔（Raymond）今日同華華食飯嘅時候分享，佢5年前已經喺中山買咗樓，樓價已經升咗3倍，近排佢帶團上去玩，食嘢、打golf兼租車，人均消費只係584蚊。

Raymond話，自己唔係首批投資大灣區嘅人士，咁啱得咁橋5年前趁低買入港人聚腳地「御龍山」2個單位，兼且打通埋，至今樓價已升值近3倍，不過Raymond呢層樓用嚟度假、招呼朋友，冇諗住炒樓，華華聽講唔少賓架同金管局高層喺呢個屋苑都有個竇。

講起大灣區，Raymond當然sell下按證公司嘅product啦。佢話想喺大灣區養老未嘗不可，安老按揭今年2月進一步容許聲明已退休人士可申請出租單位，即係賺年金收入之餘，仲有租金收入；最理想係放租香港單位，再租住平啲嘅中山單位，仲有錢落袋啊。