台灣樂團蘇打綠一連4場《蘇打綠2015再遇見》世界巡迴香港站，噚晚0係紅館開鑼，開三面台，全晚只係換咗兩套衫，青峰、馨儀、阿龔、阿福、家凱同小威六個成員每人著住唔同顏色嘅歌衫，好似條彩虹咁，另一套就係銀色。

開騷喇!阿福話想聽下粉絲嘅聲，叫佢哋大聲嗌下，觀眾又好聽話即刻大叫，一開場，已經好好氣氛。跟住著紅色衫嘅青峰對住著綠色衫嘅阿福講：「紅和綠，十足搞臭屁。」你一言，我一語咁，蘇打綠台上造氣氛一流，阿福仲話第三次喺香港開騷，上一次開騷嗰時，成員小威上演即場求婚記，0依家小威老婆大咗肚，所以青峰講笑話：「第三次，小威老婆會否在台上生產呢?」

青峰笑話蘇打綠喺香港紅過喺台灣，因為台灣都未試過一連開四場，所以有人問過佢哋會唔會留力唱：「留力太對不起之前看的觀眾，張惠妹開了十場，陳奕迅也開了十多場，我們還年輕，要和前輩看齊。」

阿龔唱到《控制狂》時，冇彈銅琴，而係狂跳舞，仲走去緋聞女友馨儀身邊好落力起勢咁跳，觀眾即刻起哄，阿龔就乘機攬攬馨儀，馨儀怕怕醜醜咁掩面，阿龔再作狀錫馨儀。之後唱《相對論》，阿龔唱到攰，又借啲宜俟住馨儀，青峰都忍唔住對馨儀話：「你腳下有變態佬。」馨儀笑住回應：「是，我還著了短裙。」

青峰全程不停搞笑搞氣氛，再爆料話阿福成日跌野，有次跌左張房卡，於是就入咗阿福房間，仲係佢嘅鏡上面寫咗：「i'mwatchingyou」不過阿福根本就冇發現唔到，最後搞清楚原因，原來阿福根本就唔照鏡。

到家凱同青峰合唱，兩個人坐住升降台唱歌，家凱因為畏高，好驚咁攬住青峰條腰，青峰提議坐低唱會冇咁驚，一坐低就發現家凱條褲嘅重要部份穿咗個窿，青峰即話：「你破洞了，褲中有點紅，那個來了嗎?企喺大銀幕後面嘅馨儀忍唔住大笑，搞到勁尷尬。

最後encore點唱環節，有個男粉絲好熱情不停咁嗌，當青峰走到對方附近時，個男粉突然大聲嗌：「在一起。」嚇到青峰好驚咁話：「我真的有點怕你。」
個男粉更加興趣更加大聲嗌話：「我愛你，在一起。」青峰笑話：「在一起，你有病嗎?」

後台訪問蘇打綠，講到點解歌衫變晒色，佢哋話因為之前都係黑灰白，好悶，想改下色，老闆就決定轉彩色。有冇爭顏色?俾隊友笑似大香蕉嘅小威搶住話：「我怎會挑這色。」彩虹係咪撐同志意思?青峰答：「只不過是這套衫著得久，領先了，不好意思」

上次開騷，小威同太太求婚，依家太太有咗BB，青峰提議佢兩公婆可以一邊唱一邊生，仲可以做埋直播。馨儀同阿龔傳緋聞，大家提議留畀阿龔向馨儀求婚，但馨儀一口拒絕，但阿威做過再做就似做騷。