當年今日
關於我們

購物焦點:
發聲雪櫃新突破加入四段錄音功能

蘋果日報 2002/01/14 00:00


之前出嗰部曉講嘢雪櫃,淨係識叫你「櫃門未關好,請即關妥」、「櫃內溫度正在上升」兩句咁大把,多句都冇,話咁易就厭。所以最新講嘢雪櫃就增加到有7句咁多,更加埋錄音功能,等你將食物到期日預先錄低,得閒Check番邊樣就快過期,唔怕嘥嘢。再加埋捷能、Wasabi辟味器、全盒等多樣功能堪稱最強雪櫃,令一批靠Cyber靚色嘅型仔雪櫃嚴陣以待。
記者:張穎倫 部分攝影:林栢鈞
錄音留言隨時聽
相信你都有試過將食物、飲品放入雪櫃,過咗期都唔知,要解決呢個問題,呢款雪櫃就設有四段錄音功能,可將留言錄低並隨時查聽。唔單止可錄低食品過期日,更可作為家人溝通橋樑,好似媽咪可以錄低「阿仔,雪櫃入面有湯,翻熱就飲得。」等字句,實用之餘,又夠溫情。
此機預設7句提示訊息,每當雪櫃出現問題就會廣播,講到問題解決為止,其中「雪櫃溫度唔夠,請拿回原廠檢查」令你對雪櫃運作瞭如指掌,適當保養減低維修機會。藍色外形非常靚,更有捷能慳電系統,內外兼備抵讚。

型號:樂聲NR-E40W2
容量:401L
體積:H1798×W590×D664mm
售價:$17,880(人氣電器店)
厲害功能逐格睇
雙色LCD顯示屏
所有錄音、溫度調校、計時等功能都由這個顯示屏操作,全中文操作,包你睇得明。錄音方面,只要按LCD顯示屏四個錄音鍵的其中一個,對着咪講,就可以錄到10秒鐘的留言。而且當你一按輸入指令,綠色的畫面便變為橙色,減少出錯機會,似足同門手機咁多色。
清潔最方便
7句預錄提示之中,以「塵埃影響雪櫃操作,請清理前柵格」最有效。每次提你嘅時候,只要拉出機底前柵格清潔,就可確保雪櫃運作正常,唔使成日抹,慳番唔少時間。
Wasabi辟味 除臭兼殺菌
一般雪櫃辟味器都只係用花味,略嫌普通。呢部新雪櫃就改用日本芥辣味,既唔會影響其他食物味道之餘,Wasabi更有強烈抗菌作用,極之有效。
全盒入雪櫃
若然你覺得小糖果同朱古力等細細件,放入雪櫃好難搵的話,呢個全盒式旋轉物品盒就最好用。同新年全盒用法一樣,各類糖果分門別類,大人細路都啱。
街坊話貴
Fanny

可以留言嘅雪櫃,確實非常方便,除咗留啲同食物有關嘅訊息外,更可留埋「記得交電費」等提示,好用到極,如果價錢平啲一定會買。
小記試用
單睇銀藍色外形,夠Sharp已經殺晒,再試過利用LCD顯示屏錄音,操作都極之容易。值得一讚係預錄提示嘅女聲非常好聽,唔係機械人聲。舊款賣到$24,980的確幾貴,𠵱家售價平咗$7,000,仍然係日本製造,價錢質素都好吸引,相信要打入中產階級市場應該唔難。
鋼身巨無霸
如果你係IT擁護者,呢部Cyber味重的不銹鋼色對掩門雪櫃一定啱你。全個雪櫃透出一股冰冷感覺,由內Cool到外,加埋機前LCD電子操控屏,讓你調校櫃內溫度,高科技感覺絕對表露無遺。巨無霸機身擁有546L超大容量,大家庭都夠用,配備兩部蒸發器同兩部風扇,確保櫃內冷風充裕。此機設有超級節能系統,能隨電壓、櫃內溫度等調整冷風輸出,夠環保。

謝小姐
淨睇相都覺得好型,對掩門最夠氣派,韓國產品質素都算唔錯,應該幾耐用,不過屋企放唔落咁大部雪櫃都冇計。

型號:三星SR-20FTLS
容量:546L
體積:W908×H1760×D724mm
售價:約$15,880(三星)
售賣日期:約3月
新月形設計價錢夠平
嫌萬幾蚊一部大雪櫃太貴,$6,000唔使一部577L容量雪櫃都算超值。雖然淨灰色機身冇咁型,但櫃門採用新月形設計睇落唔單調,夠創意。功能方面,雙風扇、多重氣流系統、除臭器等全部有齊,應有盡有,櫃內的玻璃層加可承受100kg重量。不過冇節能式系統,唔算好慳電,略嫌美中不足。

型號:聲寶SJ-68L
容量:577L
體積:W760×H1820×D740mm
售價:$5,980(華仁會)
靚色銀冰藍日本大熱
假如你覺得三星嘅新雪櫃Cool得嚟太大部,唔適合香港小家庭的話。日本代表東芝嘅銀冰藍同樣都咁Cool,呢隻機採用嘅PCM鏡面鋼板,反光程度恰到好處,喺不同燈光環境下會見到銀冰藍與灰色之間嘅顏色,相當搶眼,同系列喺日本非常流行。功能雖然冇乜特別,但多重氣流、脫臭器、蔬果格等都同樣齊備,適合普通用家。

型號:東芝GR-A25HBV
容量:246L
體積:W600×H1375×D613mm
售價:$4,398(吉之島)
冷凍平均 體積更細
有冇留意雪櫃內放得太多儲物盒的話,會擋住冷氣喺櫃內流通,導致某啲食物唔夠凍,有啲凍過龍。所以近來唔少雪櫃為咗解決呢個問題,都推出多重出風設計。但韓國LG首創嘅「智冷門」設計就更加厲害,除咗雪櫃背部會吹出冷風外,更於雪櫃門上設有隱藏冷風口,冷凍效果更勝其他牌子。而呢部最新型號,櫃壁設計更薄,令雪櫃體積更細之餘仍可保持280L大容量,至啱小家庭。

型號:LGGR-T282GE
容量:280L
體積:H1560×W580×D607mm
售價:約$2,990(和記行)
售賣日期:2月初
售賣點:
人氣電器店(23323723)
旺角火車站上蓋新世紀廣場6樓666號舖

和記行
查詢電話:25223128

三星
查詢電話:28626008

華仁會(23980280)
旺角花園街75-77號花園商業大廈5樓

吉之島(27032888)
將軍澳重華路8號東港城177號及227號舖