18歲，就是身體已是大人，但內心仍然稚嫩的狀態。幼稚不是壞事，至少比起老練的成人更澄明，更能坦然接受批評。眼前這個18歲，就是花姐口中「又肥又矮」的王嘉莉，她說：「咁我係肥嘟嘟同細粒，自己都係觀眾，知道大家鍾意睇咩，所以我都放棄過唱歌呢個念頭。」

「我細細個已經想唱歌，不過我對自己冇信心，覺得呢件事比較難。」王嘉莉日前在就讀的浸會大學內接受《蘋果》訪問時如此說。身高只有148厘米的她，曾被經理人劉卓軒大讚，才華比她的身高高很多，王嘉莉說：「如果人哋批評我嘅外形，我唔會唔開心。」但提起花姐當日的評語，她卻突然雙眼通紅，眼淚禁不住滑下來，可愛的小妮子即抬起頭：「係咪咁就唔會流（眼淚）出嚟？我都唔知點解會咁，真係唔係唔開心。」

小時候為了靚，肥妹仔用了很極端的方法減肥：「小學五、六年班左右，夜晚淨係食一啖飯，每餐五成飽就算，搞到自己營養不良，之後就冇高過。」她明白在娛樂圈發展，外形吸引是很重要的元素，王嘉莉說：「其實我啲體重一直上上落落，拍自己第一首歌《微風》個MV嗰陣，公司都叫我減肥，不過減得唔夠，好大塊面。直到參加《全民造星III》由朝chur到晚，由49公斤跌到44公斤，之後又肥返啲。」

雖然她在《造星III》曾被指似「宇宙巨G.E.M.」（鄧紫棋），王嘉莉亦欣賞她，但直言不想似對方，希望觀眾可以記得自己。至於在30強止步，王嘉莉不感驚訝：「我預咗自己喺死亡名單入面，foul到第四個，仲諗住化定個妝出去坐，可以靚靚咁離開，點知原來唔係我。」但由於賽制關係，她所屬的B組需要再淘汰5人，王嘉莉的造星之旅因而告終：「都明白佢（導師彭秀慧）嘅理由，知道我讀緊書又要兼顧比賽，都好大壓力，而且自己上台唔夠自信。」

提到讀書，現時正在浸會大學修讀幼兒教育的她，在比賽期間很難兼顧學業及比賽：「因為我嗰科唔係take attendance就算，唔上堂要畀工作證明，不過比賽又唔太關事，最後要寫報告解釋。兩邊有時又撞時間，咁兩邊都推唔到亦改唔到，真係超大壓力，惟有一早返去present完就趕去拍嘢。」王嘉莉更一度因此想放棄比賽，她說：「想放棄嗰陣，諗諗被淘汰咗嘅人，個個都好想留低，即刻問自己點解會咁諗嘢？而家完咗《造星》，我想接觸多啲音樂，不過我唔會放棄讀書。始終做演藝都唔係咁穩定，屋企人都想我有多條後路。」

與王嘉莉認識多年的好朋友Sophia及Victoria，當日亦在訪問中現身，大讚她在節目中表現很好，Sophia笑指連媽媽亦做了她的fans，每晚都在電視前為好友當應援。Sophia與Victoria鼓勵她，最重要做回自己，又大爆她平日經常無端端唱歌：「有時做做吓project，會聽到有人唱歌，試過喺WhatsApp錄歌畀我哋聽，不過佢唱歌好好聽，所以都唔會厭。」

或許18歲的苦惱，本該如此，就是學業與理想之間的掙扎，王嘉莉說：「其實今次參加《造星III》，因為好似真人騷咁，我好想體驗。自己亦冇咁多包袱，唔係好多人知我係歌手，唔會一嚟就太多評論，對我嚟講係好事，亦準備好被批評嘅心態，唔會全世界所有人都鍾意我。」敞開心窗接受批評及意見，正是18歲最大的本錢，雖然她未能在《造星III》的舞台走到終點，但路一直都在。王嘉莉強調不會停下來，目標要當個全能性的歌手。

採訪：盧妹

攝影：陳俊強

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！