十年一妙品!資深持份者又出手 350萬新兵隨時即食
呂少文星期二會星二快勝
上季本港馬匹拍賣會一批出售馬中,「巴基之星」及「京京千里」率先彈出,目前已人所共識。今日(6日)於沙田第二場四班1200米草地作戰的首次上陣馬「星二快勝」,亦係來自上季本港拍賣會。
文家良馬房3歲愛爾蘭馬「星二快勝」係咪下一粒明星,當然要拭目以待。此駒由馬主星期二會團體中流砥柱呂少文出手替該團體以350萬投得,佢買馬眼光一向有番咁上下,且十年一潤,事關佢於96年本港拍賣會,以300萬當年最高價投得的「豪情再勝」贏過三場,06年買入的「美妙選擇」更加四Win。
其實當初星期二會團體,一直想搵外地已出賽的自購馬,補替對上一匹「喜逸」,但呂少文計過數,與其花幾球買隻冇保證的高分二手馬,不如再幫襯馬會,話晒「星二快勝」57分四班起步有利,連番試閘亦有好走勢。