at17嚟緊聖誕檔期23同24號，會喺伊館舉行重組後演唱會，噚日優先訂票旋即售罄，今日盧凱彤(Ellen)同林二汶到商台宣傳，宣佈加開22日一場，公司更準備兩枝香檳畀佢哋慶祝，Ellen笑住話：「以前唔夠歲數飲，o依家可以不醉無歸。」問佢哋場地仲有冇空檔可以加場，林二汶指如果要加就要日場，佢望住Ellen話：「阿姐瞓晒未。」Ellen笑指自己係瞓唔醒。

佢哋希望今次伊館有好成績，有助稍後入紙紅館機會。今次首新歌《Girls Girls Girls》係想將女子組合精神傳承落去，而佢哋即使單飛發展時，都係堅持自己音樂風格，唔走偶像路線，仍然有出路，兼各自開埋公司，呢種都係女權態度。重組後佢哋發覺第一個問題係冇默契，佢哋話：「我哋夾唔到一齊講『我哋係at17』，同埋以前鬧交會拗到好激氣，o依家睇化咗，會接受對方嘅堅持，同埋明白點用自己方式收對方皮。」

不過佢哋指單飛後更明白對方原來當初為自己付出咁多，所以今次重組感覺似放假般輕鬆。