尾場嘉賓係杜德偉,仲有黃淑儀同薛家燕,幾個阿姐話大家識咗好耐,講起小鳳姐條22吋纖腰,佢話:「當時話我22吋,其實可能係18吋,未發育,𠵱家先至係叫做正式發育。」小鳳姐即場幫家燕姐度腰,仲以為佢笑家燕有水桶腰,原來係一齊搞笑,因為軟尺做咗手腳,成把尺都寫住22吋。小鳳姐又寸家燕姐件衫,話佢件粉紅底藍色花紋衫:「遠睇以為你着胸圍。」家燕姐笑笑口話:「咁着睇瘦啲。」
講起胸圍,小鳳姐即場分享一件陳年舊事:「好耐之前有個朋友同我講,話行女人街,內衣檔口個哥哥叫人買胸圍,佢大叫話『嚟買啦!徐小鳳都着過。』嗰時知道嬲到我死,成日想落去鬧鬼佢,嗰次之後唔敢落去女人街嗰度。」
撰文:馮仁昭