如果四叔李兆基係散戶嘅股神，咁，瑞銀證券港股策略師陸東，應該係分析師中嘅股神。噚日陸股神又出研究報告，講佢對港股前景嘅睇法，佢將明年恒生指數嘅目標價，調高到二萬八；最樂觀嘅情況睇三萬五。表面睇，洋名安德魯嘅陸股神好似執四叔口水尾；其實，安德魯近年戰績彪炳，有佢力撐四叔，即係雙劍合璧，散戶同埋芬佬都會buy。
早喺舊年十月，佢已經估恒指今年見21700，當時恒指只係啱啱升破萬八點；事實，今年一月恒指已經迫近二萬一；二月初，陸東將目標價再調高到二萬三。不過，到咗二月中，佢又話因為資金流走，估計恒指會調整千五點，但全年仍會升到二萬三。

話跌即瀉話升即彈

點知過咗幾日，恒指真係好似食咗瀉藥咁，由二萬一跌到一萬八千六，比陸東估計嘅跌多咗成千點。就喺人心惶惶嘅三月頭，陸東話股市已經調整完，可以買，之後點？恒指咪升唔停囉。
去到六月尾，陸東又繼續睇好；八月尾，就算次按拖累全球股市，陸東仍然出報告話牛市未死，力撐年底恒指見二萬三。到咗噚日，佢又發表報告估明年見二萬八，希望陸股神繼續省靚佢個招牌，散戶繼續有得執。
陸東嘅研究報告，封面都會有個龜背圖，事實上佢真係好鍾意龜，而且養咗3隻愛龜，但佢冇畀愛龜粉墨登場，封面嘅龜，全部唔係佢嘅。佢曾經講過，幼稚園老師叫佢去麗的電視參加天才兒童表演，點知佢去咗玩，老師為咗𠱁佢，就送咗隻龜仔畀佢，但係嗰隻龜「英年早逝」，享年17歲。除咗呢個原因，佢覺得龜唔黐身，脫離群眾、思考獨立，所以好抵錫。
[email protected]

陸東威水史

‧現年42歲，任瑞銀董事總經理兼香港研究、策略及產品部主管
‧曾預測去年恒指升抵17900點，令他聲名鵲起，「大好友」之名不脛而走
‧01至03年連續三屆被《亞洲貨幣》選為香港首席分析員，並連續五年成為亞太區最佳分析師
‧2000年轉職至瑞銀
‧曾任職恒生銀行、麗新發展及英國保誠等公司
‧加拿大多倫多大學商科學士畢業