股壇瀏覽器:中資流向講法多

蘋果日報 2002/02/19 00:00


藍籌股噚日表現牛皮,但國企股就異常醒神,國企指數勁升3.5%,其中上海石化(338)勁升15%,鞍鋼(347)亦大升12%。據聞因為國內AB股市𠵱家重放緊假,中資一時手痕,掃吓啲國企股炒番轉,當國內股市復市,資金可能回流都唔定,所以要盡快獲利回吐。
不過i師傅就唔係咁睇,因為國有股減持方案就嚟出台,勢必拖累A股,所以中資將資金調落嚟炒股價仍然偏低嘅H股,淨係睇吓H股近日成交唔弱就知啦,而且中資噚日唔單止掃國企,重掃埋上周落後大市嘅和黃(013)與長實(001),買盤而且唔細㖭。

中國興業乾升3成
中國興業(132)噚日突然見中銀證券排隊喺0.295元接貨,買盤共有992萬股,加上沽盤唔多,結果股價被托高30.8%,以0.34元收市。e莉莎話純粹係搭棚活動作怪,聽講沽盤其實亦係來自自己友,所以掛到0.34元都一樣有人掃貨。
此股上次7供1,每股供0.35元,由於認購不足,包銷商攬咗唔少貨上身,但據聞手貨已經俾自己友收埋,準備再炒多一轉。不過由於炒家手法麻麻,股價就算大升,都缺乏成交配合,唔易搵人跟佢玩。
金鼎(8190)上市後股價冇咩表現,近日宣布中期純利勁升1.42倍後,即刻有人跟手將隻股炒上,噚日最高見0.37元,較招股價高出逾20%,但即時見到保薦人京華山一沽貨,可能圍飛班友都等咗呢個減磅機會好耐,現價高追會有風險。