【李八方online】林鄭fb叮囑天氣凍關心長者 狂吸數千嬲：關心咗俾警察打嘅長者未？
蘋果日報 2019/12/05 12:45
林鄭月娥
呢兩日氣溫突然急降，天文台仲發出咗今年入冬後首個寒冷天氣警告，體弱嘅長者最受影響，向來平行時空嘅特首林鄭月娥專頁噚日都發帖，提醒「長者朋友」注意保暖，仲叫大家多關心身邊嘅人，特別係獨居長者，仲話「不管他們是否需要協助，你的問候都會讓他們暖在心頭。」
不過網民就唔受sell溫情呢套喇，帖文唔夠半日吸逾7千個嬲之外，仲有幾千個網民留言，內容當然唔係歌舞昇平，而係大鬧林鄭。有網民提到警察喺民居放題式催淚彈，唔少長者中咗招，反問林鄭如果咁關心長者，點會容許警察喺民居、公屋附近「TG放題」，「知唔知幾多長者住公共房屋？留意番啲長者仲要係住低層多！未凍死都中TG中到得半條人命啦!!食屎啦你！」
警察屢次被影到對長者使用暴力，包括強推落地，有網民亦都提到，反問林鄭「關心咗俾果（嗰）班所謂嘅香港警察打嘅長者未呀？」有人亦問林鄭「長者俾黑警打，老人院外射催淚彈你關心左（咗）未？唔好再係到（喺度）扮關心香港人！」有人更加話呢番說話如果係出自其他人口中係覺得暖嘅，不過出自林鄭口中，就只係感覺到凍。幾千個留言中，都有唔少人講同一番話，就係寸林鄭：「你咁冷血都會覺得冷？」