法政匯思喺呢個星期六（22日）同傳媒茶敍，同時亦係一班法政男神表演廚藝嘅好時機。咪以為佢哋浪得虛名，好似召集人吳宗鑾Chris咁，原來以前喺餐館做過，由廚房到樓面、水吧都難唔到佢，佢即場泡製一味看似平平無奇嘅蒜香芝士麵包，當佢由焗爐拎啲包出嚟後，瞬間已經被掃清，可見幾咁受歡迎。

另一位法政男神、美國執業律師Jason Y. Ng亦有料到，佢示範嘅係墨西哥粟米片配雞肉，啲雞肉佢早一晚已經醃定，喺現場將雞肉、橄欖等配料放上去，再焗一焗，同Chris嘅包有得揮。出名靚仔嘅蔡騏亦唔弱，負責整嘅玉子燒色香味俱全。

反而新一代男神楊嘉瑋就要急起直追啦。佢都算係法政嘅新成員，暫時仲係見習大律師，不過來頭都唔細，本身已經係男拔10A生嘅佢，因為拎過牛津大學香港區羅德獎學金而接受過《蘋果》訪問。佢話將來希望多啲做人權、同志平權嘅議題！

《蘋果》沙士15周年系列網站，正式登場：
https://hk.feature.appledaily.com/sars15/