經過個半月唞暑，2017/18年度馬季終於喺今日（3日）正式開鑼。

雖則賽前籠罩一股因打風而取消賽事嘅氣氛，不過天公亦冇待薄經常做善事嘅馬會，熱帶風暴「瑪娃」將喺香港約200公里外掠過，天文台亦只懸掛一號戒備信號，本賽季開鑼日得以順利進行。

開幕典禮今午12時馬匹亮相圈舉行，香港特區行政長官林鄭月娥在馬會CEO應家柏及主席葉錫安等馬會高層陪同下，一同主持醒獅點睛及敲鑼儀式，而本港一眾騎師亦有在場現身見馬迷。

另外，唔少馬迷及馬主都喺沙田馬場各主要入口，敲一敲開運銅鑼，等自己可以響呢季敲出好運，心想事成。