韓國人氣男團防彈少年團(BTS)喺世界各地都擁有高人氣，推出嘅專輯更屢破紀錄，就好似上月24號推出嘅新碟《Love Yourself 結 'Answer'》咁，繼5月發行嘅《Love Yourself 轉 'Tear'》 後，新碟再次登上Billboard Top200專輯榜嘅冠軍，係BTS年內第二次登上Billboard專輯榜冠軍。

BTS是次嘅好成績，就連韓國青瓦台、韓國國務總理李洛淵都分別喺官方Twitter留言祝賀，總理李洛淵更寫道：「BTS今年第二次拎到Billboard第一名，與曾喺同年內兩度登上冠軍寶座的披頭四（The Beatles）、貓王皮禮士利（Elvis Presley）、法蘭仙納杜拉（Frank Sinatra）等超級明星冇分別，BTS認真厲害。」而BTS吸金力驚人，其所屬事務所Big Hit娛樂受到帶挈，Big Hit娛樂將搬去新辦公大樓，據悉新大樓位於首爾江南三成洞，將有更大嘅練舞室、訓練室。

另外，隨住國務總理發文祝賀，加上韓國男足喺亞運會衛冕而令知名球星孫興民免除兵役，早前國會議員提到嘅「兵役特惠問題」亦再度浮出水面。據了解，韓國棒球選手吳至煥因為係國家隊一員，所以就算病咗冇落場比賽、只係做替補成員都獲免除兵役，引起國民爭議。所以，有BTS嘅粉絲噚日到青瓦台請願網站發文，以「防彈少年團不如吳至煥嗎？」為題，請求免除BTS成員兵役嘅內容。發文者表示，BTS喺音樂方面同樣將韓流、K-POP發揮光大，覺得只有體育界人士獲得冠軍先免除兵役嘅做法唔公平，坦言BTS比起同齡嘅歌手已經好出色，所以應該特惠BTS成員唔使服役。

精選韓流，喺晒《娛果》
http://fb.com/appledailyent