英冠伯明翰啱啱將領隊列納辭退，球會方面暫時仲未公佈接任人選，英國當地嘅博彩公司好自然會開盤，開出一系列接任人選，畀球迷落注。其中一間Paddy Power今次就擺大烏龍，竟然將一位已經過咗身嘅前英超球星伊奧古開盤，賠率有67倍。

生前效力過阿士東維拉以及米杜士堡等英超球會，伊奧古喺今年4月因為心臟病不幸逝世，享年只得44歲。博彩公司方面好快就知道出事，嗱嗱臨修正返將有關賠率下架，同埋出道歉聲明，向伊奧古嘅家人致歉，強調絕對冇任何冒犯成份。