【17：58更新】新增動新聞
【16:30 更新】警員到場經調查，以涉嫌襲擊公職人員，拘捕涉案60歲姓林阿伯。

下午2時許，讀者鍾太行經天水圍天秀公園對開，見一名阿伯被多名控煙辦職員圍著，其間一名職員突然倒地，「啪一聲，佢背脊落地，之後慢慢轉身，冇再郁，等到救護員到場先被抬上擔架床。」

鍾太引述現場目擊者稱，阿伯在天秀公園內抽煙，被在場控煙辦職員發現進行檢控，其間阿伯否認抽煙，並表現不合作，一度行出馬路，但遭控煙辦職員攔着，混亂間職員跌落地，指稱被推跌，同行職員報警。

由鍾太拍得的短片可見，當時職員趴在地上一動不動。他的同事分別報警及舉相機拍攝，其餘3名同事圍着阿伯，多次叫他冷靜，等待警員到場。當中一名職員多次爆粗：「你郁得幾多個？你傻X咗？」、「唔X好郁！幾十歲啦大家都，你打得幾多個人？」阿伯聲稱沒有打傷對方：「我犯咗咩事呀？係你同事詐死！」

鍾太透露，她平時常行經該公園，發現有不少人士在場抽煙，認為控煙辦人士只是履行職責，但事件中雙方應平心靜氣，不需要說上粗口。

雖然有目擊者作證指阿伯沒有推跌控煙辦人員，惟警員經初步調查，將案由求警協助改列涉嫌襲擊公職人員，拘捕涉案60歲姓林阿伯。

你敢爆，我敢獎！ 即Call《蘋果》24小時爆相爆片熱線 ：63836568