星辰通信（1155）受惠移動通信營運商巨額網絡建設，嚟緊日子，有排發，好兜底。星辰主打無線通信覆蓋系統設備解決方案，兼係祖國大三供應商之一。咁睇，由於祖國移動通信營運商重組成功，加埋3G牌發放，形成喺移動通信網絡上，新一輪建設高潮。單係未來3年，預計投入資金超過4000億銀（人仔．下同）。仲有，連埋阿爺4萬億人仔谷內需政策，亦有唔細份額投放喺移動通信網絡建設。星辰主打瓣數，食到應一應，肥過肥仔水。
又星辰09年半年度（6月底止），純利翻過半番，到8336萬銀，又當下半年純利，只係同上半年睇齊，全年純利1.67億銀，預期PE都係7倍幾單位數，抵買。星辰現價2.08元，翻半番到3.12元，PE都係得8.5倍，翻一番到4.16元，PE不過15倍。

中國水業超落後

中國水業（1129）現價0.25元，半年跌咗14%。同期中國水務（855）升幅23%；北控水務（371），升幅更加達到1倍；中國水業超級大落後。又中國水業最新PB0.96倍，部份水務股，PB上到兩倍至4倍不等。祖國水荒污染嚴重，水務股長炒長有，更何況，中國水業家陣平過同類股一大截，中國水業追落後，PB上番1.5倍，仲係相對便宜，但現價已經講緊翻半番。
錢雋