【買香港月餅做手信】吳謹言餵Fans食湯圓 傅恆屈膝玩Selfie
傅恆延禧攻略蘇青爾晴吳謹言魏瓔珞許凱
《延禧攻略》嘅「傅恆」許凱、「魏瓔珞」吳謹言同「爾晴」蘇青今晚喺馬鞍山一個商場出席活動,與fans共度中秋,現場一早迫滿想追星嘅fans,演員出入通道亦逼滿人,希望博合照。後來因為現場太多人,商場開放另一邊,安排座位同用大電視直播俾觀眾睇,安排算係妥當。
到晚上8點20分左右,許凱、吳謹言及蘇青喺千呼萬喚下終於現身,佢哋先同現場觀眾打招呼,吳謹言用廣東話自我介紹同講中秋節快樂,發音一般;蘇青先用廣東話自我介紹,再用普通話講「中秋節快樂」,而許凱係3人之中發音最標準嘅一個。
佢哋好識做,當司儀陳貝兒問佢哋嚟香港最想做啲乜,佢哋異口同聲賣口乖話:「陪大家過中秋節。」再問到佢哋覺得香港啲fans熱唔熱情,吳謹言坦言「好驚喜」,許凱則話「太瘋狂」,而蘇青就話原本以為大家都唔鍾意爾晴一角,好開心係冇人唔鍾意佢。
至於最愛嘅香港食物,吳謹言話係奶茶,而許凱原來係「常客」,佢話:「我由細食到大,因為我係深圳人,成日都過嚟香港食嘢。」至於蘇青就話最愛飲早茶,仲話「我每次都會去不同的店去試點心。」被問到想買咩手信返去,最代表到香港,佢哋3人話:「月餅。」
大台有喺翡翠台直播現場情況,喺約3分鐘嘅直播中,3位主場再度登場同打招呼,之後吳謹言話自己好幸福,因為可以同《延禧》啲人Re-U,又見到咁多fans。而許凱提到香港fans嘅熱情程度時,直接打咗個冷震,仲話:「(今晚活動係)今年最開心的一件事!」非常識賣口乖o氹fans。
問到佢哋以往嘅中秋係點過,吳謹言話如果撞啱有工作,家人就到去探去,到佢身邊,但今日喺香港,佢覺得所有在場嘅人都係一家人。許凱就話咁啱過去嗰兩年都要喺工作人度過,但因為家人喺比較遠嘅地方,去唔到探自己,所以唯有靠視訊。而蘇青亦話如果撞啱中秋要開工,家人就會去片場探班共度。就係咁,長約3分鐘嘅直播就完咗……
之後,返番現場,問到許凱係廣東人,叫佢教另外兩位拍檔講廣東話,許凱即刻話:「雖然我是廣東人,不過我身邊朋友都是北方人。」其後佢同吳謹言咬耳仔,想講「祝大家中秋節快樂」,不過個祝字,讀咗「注」音,但係問題不大,現場尖叫聲仍然好瘋狂。
大會安排啲幸運fans收禮物,包括應節兔仔燈籠,而喺互動環節,吳謹言餵fans食湯圓,傅恆就同fans selfie影合照,傅恆好鬼細心,屈膝遷就fans高度,o氹得對方勁開心。玩咗一輪遊戲,3人又開金口清唱咗幾句,就係咁,約一個幾鐘嘅活動就完咗,隨後大批fans落停車場等佢哋離開,3人嘅車喺9點半駛離馬鞍山,直駛佢哋入住嘅酒店,返到酒店喺卸貨區落車,約10名工作人員及保安維持秩序,落車時眾人表現nice,向記者揮手微笑。
精選娛聞,喺晒《娛果》
http://fb.com/appledailyent
吳謹言落車時揮晒手(攝影:徐錦池、羅德光、朱志聰、吳耀輝)