招商銀行（3968）9月22日以8.55元掛牌，上市冇耐傳出股神入股，加上38輪齊發效應，三扒兩撥俾人掃上12.10元高位，較招股價高逾四成，之後出現較顯著調整，噚日收報11.30元，跌34仙，跌幅近3%，現價應該沽貨定溝貨？
喺《香港討論區》內，日日有人談論呢隻股，有貨喺手嘅LV88對佢充滿信心：「未放！等佢上$15。」
a64就催促大家快啲沽貨，低位再兜番：「大家快喺11.5沽啦！質死佢再入……當然會入番啦，但𠵱家賺波幅仲好啦……大家真係唔放？今次真係招傷啦。」
經濟通則非常淡定：「溝貨囉，一啲都唔傷，又唔係買咗垃圾股。」

仲係牛熊訊號

招行𠵱家係內地最大信用卡發卡銀行，分銷網絡主要分布喺長江三角洲、珠江三角洲、環渤海經濟區域等富裕地區及大城市，由於信用卡利息收入相對其他貸款為高，業務上有優勢。
但如果純睇數字，隻股P/B逾3倍，現價PE約35倍，點睇都係偏貴，不過中資股癲起上嚟，炒家乜嘢數字都唔理，睇吓國壽（2628）同平安保險（2318）就知。
圖表上，以小時圖嚟睇，招行11蚊左右係股價密集區，應該可以一守。而且MACD仲喺0線之上，仍然係牛熊訊號，只要守住0線，技術走勢未變壞。利好股價另一個因素係工行上市，工行噚日開始全球路演，雖然話工行上市會抽走大量資金，但始終有人要晾住中資銀行股造勢，所以招行短期內不虞大跌，11蚊附近可收啲貨，博佢短線挾上12蚊，以10.80元止蝕。
余文