一講起馬德鐘同陳嘉桓,好自然令人諗起陳浩民。其他keyword包括橫店、笑功震武林、食宵夜等等。事件發生於2011年11月橫店,當年陳浩民仲拖埋大住肚嘅老婆出嚟,聲淚俱下道歉……
話咁快,陳浩民第二個BB都出咗世喇,事件都過咗咁耐,丟淡咗啦,但呢個「三人行」組合,至今亦未有再出現過……但今日,爭啲啲,爭啲啲,就出現咗——係馬德鐘同陳嘉桓同場!
話說今日陳嘉桓應邀到灣仔君悅出席瑞士護膚品牌LaPrairie午宴同新產品發佈會,莫文蔚同貝安琪都喺度,而新聞稿上,赫然見到馬德鐘夫婦都話會到!
今日陳嘉桓先嚟到,佢就話唔清楚馬德鐘都會到:「大家都做呢行,會有突發情況。今日出席專心睇新產品。」問佢如見到馬太張筱蘭時會否尷尬?陳嘉桓就話:「冇諗其他嘢,focus自己做嘅嘢。」咁係咪唔望佢就得?佢話:「專注自己。過咗去,冇再諗。」
續問道陳嘉桓是否已忘記咗不快事?是否冇再聯絡?陳嘉桓表示:「發生過不快嘅事,自己有反省過,知道繼續要點做,亦唔會做不必要嘅事。」咁即係同馬德鐘冇再聯絡?陳嘉桓搖搖頭,「唔」咗一聲,即係冇。
陳嘉桓又補充謂唔知道馬德鐘今日會到,至於到時會否打招呼?佢話:「未知,未發生嘅唔知。」咁下次出席活動前會否先打聽一下有冇馬德鐘出現再決定嚟唔嚟?嘉桓就話交俾公司處理,又補充謂公司之前應已了解過今日有乜嘢人嚟,故可能名單係臨時增加嘅。
續問到依家嘅感情生活,嘉桓話:「唔心急,冇點諗。」
本報娛樂版舉辦的「萬千星虧頒獎禮」已經來到第五屆,今屆口號為「全民起義,網民話事」,換言之由網民一人一票選出心目中最虧代表,包括男主角、女主角、最虧節目及最虧場面。讀者可由即日起至本月14日、晚上11時59分之前,到以下網址: http://campaign.appledaily.com/tvawards2013投票。投票結果於本月16日在本報娛樂版及網上公佈。