ViuTV舉辦首個實況選美節目《美選D.n.A》，與無綫《香港小姐競選》最近同時作招募，ViuTV更擺明寸大台「美貌與智慧並重」過時，宣傳片搵咗索女模特兒演繹魔鬼與天使，而賽制更突破常規，不限年齡、學歷及婚姻狀況，但一定要有香港永久居民身份證。

《美選D.n.A》今日又舉行面試，25歲Alina係全職舞蹈員兼模特兒，香港演藝學院畢業，佢今次參選係想挑戰吓自己，問佢幫邊位藝人伴舞，佢就話：「對上一次就係為Kelly(陳慧琳)，係演唱會，我畢業咗兩年半，多數係做演唱會同活動嘅嘢多啲，或者有時會拍吓廣告。」

講到參選要著泳衣、係唔係對自己身材好有信心，一身古銅色肌膚嘅Alina話：「唔緊要，自己可以再操番fit啲!」咁參加面試時，有冇咩準備，佢稱：「食嘢方面會注重啲，因為我以前超鍾意食零食，o依家會食少啲、健康啲!」佢仲話自己最高峯嘅體重係56kg，目前體重約52、53kg左右，平時自己跳舞，肌肉量多，所以會重啲，面對好多模特兒嚟參選，Alina直言要再減肥，身上都有紋身，同腳都有一個細紋身。

而做過演員嘅28歲Faye，拍過短片電影《誘星之尾》，又做過電影《鴨王》、《12金鴨》做過臨時演員，演做叫鴨嘅角色，稱係因為cast覺得佢似。

Faye自言唔知參美要著比堅尼，佢話自己參選係因為自己想做演員，做一啲多啲發揮嘅演員，想做主角或副角嘅戲份，佢亦以湯唯為目標。

講到佢身高僅158cm，佢都覺得身高上係比較輸蝕，咁你認為自己係「天使」定「魔鬼」組，佢笑言：「兩個都係!好脾氣時，就係天使，對人好，有禮貌，又或者會扶阿伯過馬路就係天使，而脾氣火爆嗰陣，就係魔鬼。」佢講同男友嘈交就係火爆。