浸會大學體育學系副教授雷雄德係獨木舟嘅愛好者，早排佢同學生一齊挑戰，由東涌碼頭划獨木舟去到澳門，全程45公里，划咗9個鐘，56歲嘅雷sir有心有力！但雷sir唔係第一次划去澳門，1982年已參加香港外展訓練學校同學會（OBAA）舉辦嘅獨木舟港澳遠征，更成為香港開埠以來，首批划獨木舟「過大海」嘅港人隊伍，當時《澳門日報》仲頭版報道雷sir嘅創舉！

同老戰友划獨木舟

雷sir同八方講，記得當年划咗好耐終於見到澳氹大橋，以為好快到終點，點知水流急、河床又淺，竟然仲要划多3個幾鐘先真正到埗，「當時真係有啲打沉意志感覺，好彩當年20幾歲，相當有毅力、拼勁，可以捱埋佢」。
34年後，雷sir再次挑戰獨木舟港澳遠征，佢話比上次艱難，「上次年輕力壯，𠵱家已經係半百老翁」，佢自己心理上同當年好唔同，想當年熱血青年諗住就咁划到底，𠵱家會邊划邊自我對話，令自己保持清醒。
點解雷sir咁迷獨木舟呢？要由1977年講起，當年佢中五畢業後，參加外展訓練時首次坐獨木舟出海，當時覺得好興奮，「用自己一雙手划，想去邊就隨意划去邊，用自己方式去邊都得」。八方問雷sir今次獨木舟挑戰最難忘係乜？佢笑住話自己班「老戰友」，估唔到34年後仲可以一齊划住「過大海」。