近年有唔少新面孔來港擔任公司騎師，縱觀他們在港首季上陣的表現，廿幾歲的一批成績明顯較好，始終後生仔學習能力較快，容易適應新環境。

每年冬季都有歐洲騎師來港客串，當中有唔少後起之秀，如近年先後來港獻技的紀仁安、巴米高、李寶利、艾兆禮等，他們都交出唔錯的成績。今年獲發牌客串三個月的莫艾誠，雖然當騎師的年資只有三年半，但已被大馬主卡塔爾賽馬集團，委任為歐洲賽事的主帥，肯定是有料之人。

這位只有21歲的後生仔，在港騎咗兩日，大部份座騎都是機會下風的大冷馬，根本冇機會發揮他的本領。不過，從他的騎姿來看，下盤夠穩，末段催策時夠硬淨，走位亦算靈活，騎功唔會差過艾兆禮，只要有實力座騎，相信好快可以在港贏馬開齋。

周日（20日）沙田賽事莫艾誠騎五駒，其中第一場四班1400米的「紅牡丹」，今季開鑼日跑同程爆冷贏馬，雖然所贏的只是五班賽，但當日在慢步速的不利形勢下，不單止能夠後上贏馬，而且輕鬆彈開之後在四班上名的「喜盈豐」個幾馬位，取勝姿態有餘未盡，勝後卻不斷轉跑其他路程，落敗不必作準。

今次回師贏馬路程，而同場對手大部份都是處女馬，只是四班弱組，莫艾誠可望取得在港首場勝仗。