民建聯嘅存在，唔單止肩負保皇重任，更重要係儆醒世人，學好英文係何等重要。繼「搓my breast」陳克勤，講英文「er」到手都震埋嘅鍾樹根，該黨「三料議員」李慧琼嘅英文「文法超錯」亦定必令你大開眼界，李慧琼今次唔單止錯文法，最重要係連民建聯嘅英文名都串錯，DAB全名入面嘅Progress，佢竟然串錯做Process，教英文嘅毛孟靜睇完成篇鴻文，以三個字總結：虐待眼睛，評級係C-。
李慧琼喺周日港台《給香港的信》嘅英文文章，絕對係中學生操練Proofreading嘅最佳練習，八方搵咗對英文甚有研究嘅毛孟靜評鑑，總括而言，李慧琼嘅英文文法錯誤，橫跨多個範疇。

串錯民建聯全名

李慧琼除咗令DAB全名嘅Progress變Process外，出席者（attendee）漏咗s、DAB have conducted應為has conducted、 連政制改革constitutional reform，錯寫成「constitution reform」，變咗做憲法改革，in a solid foundation應為on a solid foundation。
Miss Mo話，成篇文章「中文式英文」，最佳例子是「I have personally attended」呢句，因為I have attended已足夠。文法尚是其次，邏輯令人咋舌，李慧琼話民建聯一共搞咗19場政改研討會，佢出席超過20場。Miss Mo話文章尚算及格，但佢嘅評分只有C-。
李慧琼噚晚回應話，要先了解吓自己嘅錯處，明白要寫一篇文法全對嘅文章係一大挑戰。至於篇文係佢寫定係由助理代筆，李慧琼話係「綜合作品」。睇嚟成個民建聯英文最好嘅曾鈺成，要睇吓點樣改善吓黨友嘅英文水平。

mailto:[email protected]