今日就係舒淇嘅39歲生日,最近佢就拍緊由任賢齊自導自演嘅電影《我的澎湖灣》,小齊仲喺拍攝期間,送咗個驚喜畀舒淇,搞到舒淇鬼咁感動。
小齊其實一早就為舒淇送上一個驚喜,喺影電影海報期間,小齊突然拿出木結他,對著舒淇自彈自唱一曲「生日快樂」,小齊笑住話:「這是美麗的舒淇25歲生日快樂!」但係喺側邊嘅舒淇就大叫係18歲。
舒淇好開心咁多謝小齊為佢慶祝生日,之後就送咗個心型金箔燕窩生日蛋糕,仲寫住「親愛的女神,美艷動人,生日快樂!」舒淇許願後笑住話:「想不到拍海報有這個驚喜,令我感動得快流眼淚,我的生日願望是除了我和小齊這部電影有好成績,所有電影也可以有好成績!」
除咗小齊之後,舒淇嘅好朋友都有喺微博賀舒淇生日,好似陳坤咁,佢就喺微博貼咗張舒淇嘅相話:「雪麗楊(舒小姐)生日快樂。」而華誼兄弟嘅總裁王中磊都有轉貼陳坤嘅微博話:「永遠的笑笑,舒小淇生日快樂啦?」但點解係問號呢?彭于晏就貼咗張舒淇好鬼馬嘅相,仲話:「生日快樂!今天一定是十八歲生日,越吃越苗條,maymayB&G.永遠孝順妳,到底是Boy還是Girl呢?舒淇stayhealthyandhappy!」而趙薇就話噚晚同舒淇食飯賀佢生日,但係佢就唔記得同舒淇影相,所以今日趙薇就喺微博話:「長不大的小舒淇!生日快樂!昨天一起吃飯忘了拍照,就用舊圖回顧一下你的貌美如花吧!幸福快樂、無憂無慮,甜甜蜜蜜!」而緋聞男友馮德倫就未喺網上有任何表示。