德國傳媒早前爆出，中國足總為咗磨練即將出戰2020東京奧運男足項目嘅U20國奧隊，諗咗條驚世好橋，就係來季空降德國第4級別聯賽西南區賽事（Regionalliga Südwest），同聯賽19支球隊進行雙循環交鋒，只係唔計分咁解，埋單計數向每隊波「課金」13萬港紙，即係唔使250萬港元就搵到19隊「陪練」，對於揮金如土遵從習大大世盃夢嘅領導嚟講濕濕碎啦。

不過，唔係隊隊波都好似聯賽會咁冇骨氣，奧柏侯遜（Rot-Weiß Oberhausen）同艾森（Rot-Weiss Essen e.V.）近日先後喺facebook撰文聲討同諷刺有關決定，到咗周五，SV曼海姆（SV Waldhof Mannheim 07）更將行動「升級」，發表聲明指一旦成事，就會杯葛對中國U20嘅兩場賽事，仲話已經邀請上季排尾六飲恨降班嘅比馬森斯（FK Pirmasens）友賽，擺明諷刺第20隊波係比馬森斯都唔係空降嘅中國U20咁解！球會行政總裁甘普（Markus Comp）表示：「我哋已經致電聯賽會表達訴求，並要求對方解釋細節，目前仍未達成書面參賽協議。就算咁樣嘅賽事有助提升市場價值，地區嘅本質唔應該完全喪失，而喺地區聯賽同球會之間亦有更多問題需要解決。」比馬森斯亦批評聯賽會此舉純粹向錢看，有關決定令人震驚。