民建聯何俊賢最近被黨委以重任，代替因打龍通風波而辭任委員嘅周浩鼎加入立法會調查UGL專責委員會。外界好關注呢位2012年代替黃容根出任立法會漁農界議員嘅高佬，喺委員會內有冇高質素表現？原來呢位身高1米93、有成6呎3吋半高嘅議員細個唔算特別高，到中學時書友搵佢一齊打籃球，升中二嗰年先突然飆高。
今年37歲嘅高佬賢憶述兒時喺屯門區嘅成長經歷，自爆有樣食物見到就怕怕，就係「提子乾」嘞！話說佢外公係屯門青山灣漁民，媽媽則離開水上轉為做回收業、亦喺碼頭起卸區做拆貨工作，好記得當時媽媽收工後不時拎提子乾畀佢同姐姐食，食到佢哋有日的起心肝向媽媽說「不」，估唔到媽媽好順「民意」，話收到意見，「點知第二日，佢拎咗盒混合口味嘅提子乾返嚟……」

小時家貧 最愛玩水

呢段童年回憶令佢同家姐至今抗拒提子乾，笑言就連食泰式炒飯，都要挑番啲提子乾出嚟。佢話細個屋企冇乜錢，最開心係同家姐、細佬一班人柴娃娃去泳灘游水，不亦樂乎玩餐飽。
高佬賢晉身立會議員都同媽媽有好大關係。佢話當年唔少漁民會搵媽媽幫手睇信件同諮詢意見，佢喺英國伯明翰大學讀畢通訊及電腦系統工程後返港，亦有幫媽媽手解答業界問題，之後入埋業界組織，繼而獲選業界代表。