【八方動起來】慢必冧仔有妙法 「梳毛毛」係撒手鐧
貓同性戀慢必陳志全同志GAY平權動物保護法八方動起來保動
歌仔都有得唱,做隻貓做隻狗不做情人……可想而知,貓狗幾咁獲寵幸!人民力量立法會議員「慢必」陳志全多年嚟都係「貓奴」,八方早前深入慢必嘅安樂窩,了解佢哋8歲嘅孖仔貓貓「洋葱」同「薯仔」嘅相處之道,肥嘟嘟嘅洋葱非常好客,主動上前掃八方隻腳打招呼,細佬薯仔就比較怕醜,一直匿喺慢必睡房……而成間屋周圍,仲被好多有人話似貓嘅「寵物小精靈」角色伊貝包圍,唔使問都知慢必鍾情原因;真假通殺,仲唔係名副其實嘅貓癡?
其實慢必唔係天生就係「貓奴」,佢話細個同屋企人住板間房,曾經被鄰居養嘅貓嚇過、抓過、咬過,對貓有啲心理陰影。但隨住媽媽其後喺地盤執咗隻流浪貓養後,先至發覺好多貓都好可愛,原先嘅恐懼就轉化成愛心,之後佢同男友同居,養咗人生第一隻貓「小吉」,一養就養咗10幾年。小吉13歲因急病離世後,慢必當時傷心到諗過唔再養貓,但最後都同當時男友喺愛護動物協會領養咗洋葱同薯仔,雖然領養呢對「孖仔」1年後就同男友分手,但佢呢個「單親」家長仍全心全意照顧佢哋,仲將「愛貓」列為擇偶條件。
講到養貓最開心之處,慢必話啲貓好黐身,一返到屋企就被撩住要玩,一出街就表現得好唔捨得,相信貓奴都有好深感受。而佢嘅氹「仔」秘訣都唔少,包括「抓面面」同「梳毛毛」(記住嗰兩個叠字,要cute啲咁讀嘅),八方當日見證慢必向洋葱施展「撒手鐧」時,洋葱即時瞇晒眼兼全身放鬆嗰個冧樣。
為咗主子身體着想,慢必都用咗唔少心力,例如為咗減低佢哋患上腎衰竭風險,特別喺屋企擺多啲裝滿水嘅水兜,慢必發現啲水有表面張力,貓會比較鍾意飲。貓糧方面,佢就根據貓嘅年齡做調整,目前已改餵7歲幾嘅貓仔食老貓糧,希望控制佢哋體重。
動物保護法據聞今年有喜訊,關心同志平權外,同樣關心動物權益嘅慢必話呀,除咗狗狗,特區政府應該可以為貓貓做多啲嘢,指出香港法例現時只強制養狗要植入晶片,無強制養貓要植入晶片,認為如果養貓都有呢個法律要求,就會有較大阻嚇力,減少棄養貓貓嘅情況。
-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef
雖然係「單親」家長,慢必都好落力照顧呢對「孖仔」。夏家朗攝
《寵物小精靈》嘅伊貝,都喺慢必小天地佔一席位。夏家朗攝
連屋企嘅牆上都有貓蹤──Hello Kitty。夏家朗攝
呢對「孖仔」係慢必同前男友領養嘅,就算分咗手都繼續照顧佢哋。慢必提供相片