新婚人夫陳柏宇今日喺商台宣傳年尾紅館演唱會，門票已經賣晒，唔使驚驚，可以專心做宣傳。問佢演唱會有咩特別嘅地方？人夫話：「其實真係好難答，雖然我會參與開會，但係我自己好信任團隊嘅專業，所以製作上嘅嘢，我唔會參與好多，我最緊要都係做番自己。」

陳柏宇話最重視係揀歌部份，除咗會揀熱門歌曲，亦希望揀一啲新碟嘅side track，希望可以表達多啲自己嘅感覺：「好似有啲中板歌或者快歌咁樣，如果全部都係粉絲揀，應該變咗全部都係唱慢歌。」

陳柏宇話總會有跳舞部份，但係就唔傾向騷肌肉：「騷手臂囉，我唔想向除衫嘅方向，除非自己覺得幾熱要除衫。如果真係要除衫，我想孭個背囊仔，等大家可以塞啲錢落我個背囊度。」記者笑指佢著條底褲，等粉絲塞錢？陳柏宇笑謂：「咁都塞唔到幾多，同埋騷肌肉嘅嘢，留番比郭富城跳嗰啲勁歌熱舞，佢就有型啫，我跳低能舞，唔想着咗等於冇着，都唔有型。」

陳柏宇又話同太太都努力造人中，隨時都準備好做爸爸：「就算演唱會前有都冇問題，我開演唱會，又唔係佢開。」