梁詠琪（GiGi）今日以大使身份出席旺角「愛飾動物日」啟動禮，與香港愛護動物協會會長傅明憲齊齊宣揚愛護、尊重及接納所有動物嘅訊息。本身家中都領養咗唐狗女Luna嘅GiGi，一向都鼓勵大家以領養代替購買，更唔好將動物當禮物送贈別人，但佢覺得香港人尊重動物意識越來越高。

當年GiGi懷孕時，佢同老公Sergio為咗令囡囡Sofia同愛犬Luna相處融洽，就一齊去上「BB和動物共融班」，GiGi話：「嗰時大住肚上堂，同班都有幾位孕婦媽媽一齊上，個課堂都好有幫助，教我哋帶BB返屋企入門口嗰陣時，就要先踎低畀狗狗先聞下BB隻腳習慣下佢嘅氣味，o依家佢哋會一齊玩，冇mood時候就互相當透明。」GiGi又話Sofia有時又會主動想餵食物畀Luna，而食飯時Luna會坐喺Sofia身邊，等食物跌落地上即刻上前食。

提到GiGi老公之前代理嘅西班牙童裝品牌，落實由網店變成實體店，GiGi話：「係好消息，又係一個壓力，因為香港嘅租金實在好貴，但係都有信心可以做得到。」GiGi透露只有少少投資，因主要係老公負責經營，連店舖設計都唔會俾意見。

另外，GiGi日前將Sofia打鼓短片放上網，佢話：「係佢見到我打得好有型，跟住自己就試下打，我都開始發覺佢對跳舞、音樂同踩單車有興趣，嚟緊都會同佢報多啲戶外活動，等佢認識多啲朋友。」

提到近日熱話、劉德華將紅館演唱會門票改為網上售票（新聞連結： https://bit.ly/2Lz0F7h ），GiGi話：「我覺得喺o依家呢個情況下，係暫時唯一解決嘅方案，希望政府同埋有關機構，可以再諗多啲措施杜絕黃牛，學劉德華講唔係一個或者兩個歌手可以改變呢件事。」

精選娛聞，喺晒《娛果》
http://fb.com/appledailyent