今早錢國偉鬧爆施念慈間「加秀娛樂」，開咪指摘謂:「為何是在香港經理人施念慈期下的藝人，也會做我們一直討厭的事，欺騙觀眾虛假事實，是當內地觀眾好騙！」皆因施念慈旗下有個DaDa陳靜，傾好晒出席埋《夜蒲3》開鏡，忽然一句正式向當事人交代都冇就話退出娛圈；依家又有另一個施念慈旗下藝人「出事」——就係DaDa師妹曾善美(MeiMei)，被揭自稱《夜蒲3》女主角，印曬海報喺內地夜場騷搵食。但錢導澄清，呢個MeiMei，喺戲中只係出鏡三秒。

因為之前已有露暈女子組合借《夜蒲3》抽水，而就DaDa復出一事，錢導覺得施念慈欠誠信，講嘅一套但做嘅係另一套，故今次矛頭直指向施念慈。

施念慈嘅加秀娛樂當然都知道呢單嘢，故第一時間出來解釋:「我們今天才知道這宣傳海報一事。我們從沒看過這宣傳海報。經紀公司負責人SimonWaii也證明瞭這宣傳海報未經我司批准及審核。我們已經馬上要求酒吧更改宣傳海報，否則我們絕不給藝人到場演出。」

不過，有網名「小經紀小小強」嘅工作人員，就回應謂:「所以最大責任一定是經紀公司，先把角色刪掉(如果她真的有拍)再找經紀公司出來就這次行為應該殺一警百。」又寫道:「酒吧才是最大受害者，這個女又不是什麼明星，只是一個普通模特，酒吧那會知道這個人，一定是經紀公司炒作欺騙酒吧說她是喜愛夜蒲演員(像Ad2、曾寶玲的經紀公司一樣)，再者做活動的宣傳物，經理人公司一定要審核才可以對外宣傳，現在出現問題經紀公司還要把責任推到客戶身上，可見他們真的為錢多不負責任。」

錢導女友兼有份參演《夜蒲3》嘅陳宛蔚就回應謂:「Ohno!!」再加上嬲爆公仔；蔚雨芯就歎道:「唉，又嚟!」施念慈及錢國偉暫未於微博回應。