當年今日
關於我們

【離開無綫之後】郭羨妮free晒搵真銀:唔使經太多嘢

蘋果日報 2015/09/19 06:00

蘋果續約無綫TVB郭羨妮解約即時杏兒大台唔使經太多嘢sonjia家豬

有報道「肚瀉」呢個term,形容無綫小生花旦逃亡潮,而且流失率創歷史性新高,約滿藝人離巢後不再續約,好似陳茵媺、吳卓羲、徐子珊、朱璇就已經約滿,佘詩曼明言正等待約滿,99年港姐冠軍郭羨妮(Sonija)亦已經約滿無綫,之前有傳會投老公朱少杰在內地投資的製作公司,實行夫唱婦隨,不過郭羨妮否認。

今日郭羨妮到荃新天地出席奧比斯活動,仲為小妹妹加冕,就好似為港姐戴上后冠咁。問及郭羨妮如果「家豬小姐」(囡囡)想參加選美,俾唔俾呢?郭羨妮就笑笑口話:「依家最緊要係讀書先,嗰啲係好遠嘅事,等佢攞十優先啦,依先好興呀嘛。如果佢讀完書去選美,我都支持。」

家陣家豬小姐讀緊K1,郭羨妮日日陪女返學做功課,又笑言個女開始百厭,但又好識氹人,仲好貪靚,次次媽咪化妝,佢都會八卦豬眼望望,仲成日擒上擒落,難怪郭羨妮話女兒出世後要不停望實佢。

離開大台,無約一身輕,郭羨妮形容自己依家係喺一個好舒服嘅狀態:「做自己鍾意做嘅事,亦都冇同其他地方簽約,包括內地。好似今次活動咁,離開TVB之後,都唔使經太多嘢,自由度高咗,而且我都有自己經理人。」

郭羨妮就成個鬆晒,但大台就想用十年長約綁住小生花旦,唔聽話唔簽就入雪櫃,好似傳聞中嘅馬國明咁。

郭羨妮同林家棟都係咁睇,如果係新人的話,用十年去發展都OK,郭羨妮話自己都喺TVB十幾年:「選完港姐嗰陣簽三年,一直續約,而且培育新人都好正常。」但41歲嘅馬國明……唔係新人喇喎……郭羨妮就話:「每個人有唔同case,好難去講人哋嘅case嘅。」

唔講人哋,講番自己,郭羨妮話佢離開無綫原因,係因結咗婚,有細路仔:「唔想要承諾拍劇,而且唔一定要拍劇嘅。依家主要陪個女,陪佢開學,我想要有私人空間。」之前有傳郭羨妮唔肯續約,係因為無綫將之投閒置散,要佢做配角,郭羨妮表示:「冇咁嘅事。」