剛出任廉政專員嘅羅范椒芬，雖然任教統局常任秘書長時被過萬教師叫下台，但亦都有支持者。教聯會噚日聯同30幾個教育團體，喺灣仔一間酒家擺咗29圍歡送佢，搞到羅太心花放，周圍同人攬頭攬頸，風光再現；唔少人同佢講笑話，希望唔好請佢哋去老廉飲咖啡。
成晚焦點唔止得羅太，仲有較遲嚟到嘅羅太老公羅延康醫生。帶備數碼相機影相嘅羅醫生，話好開心太太調職，因為可以有多啲時間陪佢。見到老公被記者圍住，深知禍從口出教訓嘅羅太護夫情急，上前擋駕時又好似講錯嘢，皆因羅太話羅生再講會俾醫務委員會捉去聆訊，但係醫委會好似冇條例禁止醫生講老婆喎。
羅太話呢兩個禮拜同廉署同事了解咗好多，對被調職冇遺憾、又好開心。教聯會會長楊耀忠爆料話，有次羅太半夜跟蔡元雲醫生去天水圍搵「夜青」，捉到一個佢間中學嘅中三學生，第二日羅范即刻打畀佢，叫佢多啲關心學生。