超級丹林丹日前被爆趁老婆謝杏芳大肚期間，背妻偷食內地女模兼演員趙雅淇，有報道更指趙雅淇多年前曾搭上「小小超」李澤楷，巧合地當時小小超嘅女友梁洛施（Isabella）又係大肚，網友仲揶揄趙雅淇「難道有勾搭準爸爸的嗜好？」
平日對緋聞好低調嘅小小超，噚日卻高調透過公關公司發聲明澄清：「就日前有關趙雅淇小姐的媒體報道，在此特意澄清李澤楷先生從不認識報道中的趙小姐。有關報道完全沒有事實根據。」小小超自從同Isabella分手後，雖然身邊不時有女伴出現，最近盛傳撻着《東張西望》主持郭嘉文，兩人被爆今年情人節同遊日本，但依然冇確認對方女友地位。

謝杏芳傷心

至於出軌嘅林丹獲老婆原諒，謝杏芳喺微博發文：「一家人風雨同舟」，不過，噚日有內地傳媒曝光幾張疑似係謝杏芳同朋友聊天紀錄，話謝杏芳曾經寫另一個回應：「別人別有用心的選擇在我坐月子的時候報道消息，我真的十分傷心痛苦。」另又有疑似趙雅淇工作室回應，話林丹係酒後失控，趙雅淇都係受害者。
撰文：馮仁昭